കരിമല കയറ്റം കഠിനം പൊന്നയ്യപ്പാ ....
മാന്ക്കുളം ഫോറസ്റ്റ് ഡിവിഷനിലെ ശംഖുമലയില് വരയാട് സര്വേക്ക് വന്നതായിരു ഞങ്ങള് കുറച്ച് പേര് .ആടിനെ തപ്പി മലകയറിയ ഞങ്ങള് തിരിച്ചിറങ്ങുപ്പോള് ,ഞങ്ങള് കയറിയ വഴിയിലൂടെ ഒരു കൂട്ടം ആനകള് കയറിവരുന്നു .വളരെ ഒന്നും ആടിനെ കാണാതെ നിരാശരായി തിരിച്ചിറങ്ങുകയായിരുന്ന ഞങ്ങള്ക്ക് ഈ കാഴ്ച വളരെ സന്തോഷം തന്നു.
ആനകള് താഴെയും ഞങ്ങള് സുരക്ഷി്ഷിതരായി മുകളില് പാറമോലുമായി അങ്ങിനെ ഒരു മണിക്കൂറോളം ആ രംഗം ആസ്വദിച്ചിരുന്നു .ഞങ്ങള് തന്നെ വളരെ കഷ്ടപ്പെട്ടാണ് മലയുടെ മുകളില് എത്തിയത് ,ഈ ആനകള് ഒരാള്ക്ക് കടക്കാവുന്ന പാറയിടുക്കിലൂടെ വളരെ ബുദ്ധിമുട്ടി ഓരോത്തരയായി മുകളിലേയ്ക് കയറി .ഈ ഗ്രൂപ്പിലെ കുട്ടിക്കുറുന്പന്റെ കുറുന്പ് കണ്ട് നില്ക്കാന് നല്ല രസമായിരുന്നു . അവന് കുറുന്പ് കാണിക്കുപ്പോള് ,അവന്റെ അമ്മയും ആന്റിമാരും പതുക്കേ തുന്പികൈകൊണ്ട് കുട്ടിയാനയെ മലമുകളിലേയ്ക് കയറ്റുന്ന കാഴ്ച കാണേണ്ടത് തന്നെയാണ് .ഈ ഗ്രൂപ്പില് ഒരു ചെറിയ കൊന്പനും കൂട്ടിനുണ്ടായിരുന്നു .ഒടുവില് ഞങ്ങള് ഇരിക്കുന്ന പാറയുടെ നാലോ അഞ്ചോ മീറ്റര് താഴത്തുക്കൂടി ഇവര് മലയുടെ മുകളിലെത്തി . അത്ര നേരം ശ്വാസം പിടിച്ച് ഒച്ചയുണ്ടാക്കാതെയുംഅനങ്ങതെയും ഇരുന്ന ഞങ്ങളെ ഈ ഗ്രൂപ്പിലെ നേതാവ് എന്ന് തോന്നിയ പിടിയാന കണ്ടത് അപ്പോഴാണ് . കുറച്ച് നേരം ഞങ്ങളെ നോക്കിനിന്ന ശേഷം കുഴപ്പക്കാരല്ലന്ന് മനസ്സിലായപ്പോള് അവര് പതുക്കേ മലയുടെ മറുഭാഗത്തേയ്ക്ക് നടന്ന് നീങ്ങി . ഒന്ന് ദീര്ഘമായി നിശ്വസിച്ച് ഞങ്ങളും അന്നത്തെ സര്വേ അവസാനിപ്പിച്ച് സന്തോഷത്തോടെ മലയിറങ്ങി .
No comments :
Post a Comment