ഉണ്ണി കൊടുങ്ങല്ലൂര്‍

ഡിജിറ്റലായി ഇടപാടു നടത്തൂ, ഒരു കോടി രൂപ വരെ സമ്മാനങ്ങളുമായി കേന്ദ്രസർക്കാർ

by  സ്വന്തം ലേഖകൻ 

ManoramaOnline | Thursday 15 December 2016 06:57 PM IST

ന്യൂഡൽഹി∙ ഡിജിറ്റല്‍ പണമിടപാടുകള്‍ പ്രോല്‍സാഹിപ്പിക്കാന്‍ കേന്ദ്രസര്‍ക്കാര്‍ പുതിയ പദ്ധതികള്‍ പ്രഖ്യാപിച്ചു. ഉപഭോക്താക്കള്‍ക്കായി ലക്കി ഗ്രാഹക് യോജന, വ്യാപാരികള്‍ക്കായി ഡിജി ധന്‍ വ്യാപാരി യോജന എന്നീ പദ്ധതികളാണു നീതി ആയോഗ് സിഇഒ അമിതാഭ് കാന്ത് പ്രഖ്യാപിച്ചത്.‌ നേരത്തേ, ഇന്ധനം നിറയ്ക്കുന്നതിനുൾപ്പെടെ ഡിസ്കൗണ്ടും മറ്റും പ്രഖ്യാപിച്ചു കേന്ദ്ര ധനമന്ത്രാലയം ക്യാഷ്‌ലെസ് ഇക്കോണമിക്കു വൻ പ്രചാരം നൽകിയിരുന്നു. ഈ നീക്കത്തിനു പിന്തുണ നൽകാനാണു നീതി ആയോഗിന്റെയും ശ്രമം.
സമ്മാന പദ്ധതി ഇങ്ങനെ:
∙ ക്രിസ്മസ് മുതൽ നൂറ് ദിവസത്തേക്കാണ് സമ്മാന പദ്ധതി. 15,000 വിജയികൾക്ക് 1000 രൂപാ വീതം സമ്മാനം. ഡിസംബർ 25 – 2017 ഏപ്രിൽ 14 വരെയാണ് കാലാവധി.
∙ ആഴ്ചതോറും 7,000 നറുക്കെടുപ്പുകൾ. ഉപഭോക്താക്കൾക്കു പരമാവധി ഒരു ലക്ഷം രൂപ സമ്മാനം. വ്യാപാരികൾക്കു പരമാവധി 50,000 രൂപ വരെയും സമ്മാനം.
∙ ഏപ്രിൽ 14ന് ഉപഭോക്താക്കൾക്കായി മെഗാ നറുക്കെടുപ്പ് നടത്തും. ഒന്നാം സമ്മാനം ഒരു കോടി രൂപ. രണ്ടാം സമ്മാനം 50 ലക്ഷം രൂപ. മൂന്നാം സമ്മാനം 25 ലക്ഷം രൂപ.
∙ 5,000 രൂപയ്ക്കു മുകളിലും 50 രൂപയ്ക്കു താഴെയുമുള്ള പണമിടപാടുകൾ സമ്മാനത്തിനു പരിഗണിക്കില്ല.
∙ ബിസിനസ് ടു ബിസിനസ് (ബിടുബി) ട്രാൻസാക്‌ഷനും ഈ സമ്മാനത്തിനു പരിഗണിക്കില്ല.
∙ റൂപെ, യുഎസ്എസ്ഡി, യുപിഐ, എഇപിഎസ് ഉപയോഗിച്ചു നടത്തുന്ന പണമിടപാടുകൾ മാത്രമേ സമ്മാനത്തിനായി പരിഗണിക്കുകയുള്ളൂ. മാത്രമല്ല, ക്രെഡിറ്റ് കാർഡുകൾ, ഇ – വാലറ്റ് തുടങ്ങിയവയിലൂടെ നടത്തുന്ന പണമിടപാടുകളും ഈ സമ്മാന പദ്ധതിയിൽ പരിഗണിക്കില്ല.  

© Copyright 2016 Manoramaonline. All rights reserved.